எவரெஸ்டைக்கண்டு ஏங்கியது ஒரு காலம்.
இன்றோ அதன் மேல் படபடக்கிறது வெற்றிக்கொடி!
தொட்டுவிடத்தான் சிகரங்கள். தொட்டு விடு!

ஓட்டப்பந்தயத்தில்தான் எத்தனை தடைகள்?
ஒருமுகப்பட்டால் அத்தனையும் தூள்.
தாண்டிடத்தான் தடைகள். தாண்டி விடு!

முட்களைக் கண்டு சுணங்கி விடாதே
முனைப்பாய் ரோஜாக்களை மட்டும் தேடு.
சூடுவதற்குத் தான் மலர்கள் சூடி விடு!

இன்னல்களை மீறி பீறிட்டு வரும்
இனிய இசைதான் வாழ்க்கை.
இசைப்பதற்காகத்தான் இசை. இசைத்து விடு!

அடிமைத் தளையில் சிக்கி சோர்ந்து விடாதே.
ஆர்ப்பரித்துஎழு அலை கடலாய்.
ஆளப்படுவதற்கே ராஜ்ஜியங்கள். ஆண்டு விடு!

வேதனைத் தழலில் சிக்கி சோர்ந்து விடாதே
வீறு கொண்டு எழுந்து பறி வெற்றிக் கனியை.
வென்றிடத்தான் வாழ்க்கை. வென்று விடு!

பாகம்பிரியாள்.