விறகாகும் பொன்வீணைகள்

சுதந்திர வெளிச்சம் மறுக்கின்ற
துயர அடிமை இருள்சிறையில்
பதமுறச் சட்ட விளக்கொளியைப்
பரப்ப நாட்டில் வினைசெய்வோம்!
இதமுற எளியோர் உழைப்பிற்கும்
ஏற்ற கூலி பெறச்செய்தால்
சதையினால் ஆன பொம்மைசனச்
சரித்திரம் மாறிப் புதிதாகும்.

கல்லா மடமை போக்கிடவே
கல்வி தந்து கண்திறக்க
எல்லா வாய்ப்பும் ஏற்படுத்த
எளிதாய் அடிமை வலைகிழியும்.
இல்லா வறுமை ஏழ்மையினை
ஏற்ற பணியால் மாற்றிட்டு
முள்ளாய்க் குத்தும் பினணத்தளையின்
முடிச்சை அவிழ்க்க முனைந்திடுவோம்!

எடையின் தட்டில் ஒன்றாக
இறைவன் படைத்த மனிதர்களே
இடையில் அடிமை ஆண்டானாய்
ஏனோ தம்மைப் பிரித்திட்டார்.
படையாய் நாட்டின் மேனியிலே
பார்த்தோம் பினணப்புச் சங்கிலிகள்!
விடையாய் இன்பம் தினம்காண
வெற்றி கொள்வொம் அடிமையினை!

பொருளா தாரப் பள்ளத்தில்
புழுவாய் நெளிந்து சாகின்ற
அறியா ஜனங்கள் மேல்வந்து
அரியா சனத்தில் அமர்ந்திட்டு
சரியா சனங்கள் உருவாக்க
திருநாள் இன்றே சூளூரைப்போம்
தேச நலத்தை நாம்போற்றி!

மனித நேய மரவேர்கள்
மண்ணில் ஆழக் காலூன்ற
இனிய உரிமை எழில் பூக்கள்
என்றும் மலர்ந்து வெற்றிகளால்,
கவியும் இருட்டாம் கொத்தடிமை
இனியும் நாட்டில் இல்லையென
இன்பக் கீதம் நாம் இசைப்போம்.

முத்து. இராமமூர்த்தி