மதுரகாளீ!

ஆதிபராசக்தி தான் க்ரியாஷக்தி (துர்கை), இச்சாஷக்தி (லக்ஷ்மி), ஞானஷக்தியாய் (சரஸ்வதி) விளங்குகிறாள்.

தேவர்களுக்கும், அசுரர்களுக்கும் போர் மூண்டபோது, துர்கை தனது அதீத ஷக்தியான காளிகாதேவிக்கு உயிர் கொடுத்ததாய்ச் சொல்லப்படுகிறது. காளிகாதேவி அசுர வடிவங்களை சம்ஹாரம் செய்து, மாலையாக்கி கோர தாண்டவம் புரிகிறாள். பிரளயத்தில் ஒரு யுகமே முடிந்த அறிகுறியுடன் கோர தாண்டவம் ஆடுகிறாள். தன் பணி முடிந்ததும் தெரியாமல் அவள் அழிவில் மூழ்கியிருக்கும் போது, சிவன் ஒரு குழந்தை உருக் கொண்டு மயானத்தில் தோன்றுகிறார். குழந்தையைக் கண்ட மாத்திரத்தில் அவள் வெறியும் கோபமும் அடங்கி, இறப்பின் நடுவில் பிறப்பின் தத்துவத்தை உணர்த்துபவளாய் அதைத் தன் மார்போடு அணைத்துப் பாலூட்டுவதாய் புராணம் கூறுகிறது.

திருச்சியைத் தாண்டி பெரம்பலூர் மாவட்டத்தில் சிறுவாச்சூர் என்ற ஸ்தலத்தில், 'மதுரகாளியம்மன்' கோவில் இன்றும் பல பக்தர்களின் வழிபாட்டுடன் சிறந்து விளங்குகிறது. பலருக்குக் குலதெய்வமாய் விளங்கும் இவள் திருக்கோவில், திங்கள், மற்றும் வெள்ளிகளில் மட்டுமே திறந்திருக்கிறது. கோவிலின் உள்ளே கிணற்றடியில் குளித்து, அங்கேயே மாவிளக்கு இடித்து அம்மனுக்குப் படைக்கிறார்கள். குளிக்க, மாவிடிக்க என எல்லாவற்றிற்கும் வசதி கோவிலிலேயே இருக்கிறது. தற்போது இன்னும் விஸ்தாரமாய் உடை மாற்ற சுற்று மண்டபங்கள் கட்டப்பட்டுள்ளன.

சிலர், மதுரையை கண்ணகி எரித்த பிறகு மதுரையில் வாழ் காளிதேவி, மதுரையை விட்டு சிறுவாச்சூரில் கோவில் கொண்டாள் எனக் கூறுகின்றனர்.

வேறொரு கதைப்படி, ஐந்து ரிஷிகள் மலையில் தவமியற்றிக் கொண்டிருந்தனர். இவர்கள் திங்கள் மற்றும் வெள்ளிக்கிழமைகளில் காளிகாதேவியை வணங்கி வந்தனர். அவளும் இறங்கி இவர்களுக்கு அருள் பாலிக்க, அவளை மரத்தடியில் குடிகொண்டு தாங்களின் பூஜையை ஏற்க வேண்டும் என்று கூறினர். ஒவ்வொரு நாளும் பூஜிக்கும் போது, மரத்திலிருந்த தேன்கூட்டிலிருந்த தேன் ரிஷிகள் வாயில் விழுந்ததாகவும், அதனால் 'மதுர' காளி என்ற பெயர் வழங்கப்பட்டதாய் இன்னொரு கதை கூறுகிறது. எனினும், பலரால் நம்பப்படுவதாக இருக்கும் ஒரு புராணக்கதைப்படி, செல்லியம்மன் என்ற தெய்வம் தான் முன்பு காளியின் இக்கோவிலில் குடிகொண்டிருந்தாள். அவள் ஒரு முறை மந்திரவாதியின் மாயத்தில் சிக்கி அவனுக்கு அதிக வரம் கொடுத்துவிட்டு, அவனிடம் அவதியுற்று அடிமையாய் இருந்து வந்தாள்.

இன்றும் வரும் பக்தர்கள், மலையில் இருக்கும் செல்லியம்மனையும் தரிசித்துவிட்டுத் தான் செல்கின்றனர்.

காளி என்பவள் கொடுமைகளையும், அரக்க குணங்களையும் ஈவு இரக்கமின்றி அழிப்பவள். கேட்டினை அழிக்கும் வடிவத்தின் உருவகமே காளிகாதேவி. உக்ர தெய்வங்களிடம் பக்தியுடன் முறையிட்டால், அவர்கள் விரைவில் அருள்பாலிப்பார்கள் என்று கூறப்படுகிறது.

காத்து நிற்கும் பகதர்களுக்கு கேட்கும் வரம் தரும் அன்னையைக் கண்டு, அவளின் அருளுக்குப் பாத்திரமாவோம்.

ஒம்சக்தி ஓம்சக்தி ஓம்
பராசக்தி ஓம்சக்தி ஓம்சக்தி ஓம்!

அன்புடன் - ஷைலஜா

Your Feedback